Цішэй, розум, цішэй.
Ты проста пазнаў скрыжаванне.
Колькі жыццяў у гэтай яме
Мы ганяем з табой чарцей.
Цішэй, сэрца, цішэй.
Гэта пекла. За хваляй - хваля,
Мы з табою заўжды трывалі.
Дачакайся. Сыдзе. Сыдзе.
Цішэй, вочы, цішэй.
Вы ўжо бачылі гэту цемру.
Не давайце ёй болей веры,
Па-за цемрай святло брыдзе.
Цішэй, вусны, цішэй.
Вам было ўжо гэтак млосна,
Вам хвароба - што бацька хросны.
Ён часова сярод гасцей.
Цішэй, носік, цішэй.
То ж звычайная зброя ката.
Сёння пах узмацняе краты,
Заўтра будзе і ён лягчэй.
Цішэй, вушкі, цішэй.
Крыкі думак заўжды сціхаюць.
Пачакайце, пакуль сканаюць,
То ж не першая з іхніх дзей.
Цішэй, подых, цішэй.
Гэта пекла - шляхоў палова.
Перайдзі і паўстань нанова
Там, дзе хвосцік прыкусіць змей.
Цішэй, розум, цішэй.
Ты проста пазнаў скрыжаванне.
Колькі жыццяў у гэтай яме
Мы ганяем з табой чарцей.
25.12.23
Аутакалыханка
© Copyright: Мария Руслановна Шебанец, 2023
Свидетельство о публикации №123122602287
Свидетельство о публикации №123122602287
Рецензии