Тау миллетни жарсыулары

Халкъыбызны бюгюннгю кюнюню юсюнден сагъышла

Бизни аз санлы халкъда
Кёпдю бюгюн жарсыула -
Бу тынгысыз дунияда
Керти къоркъуу салгъанла.

Багъалап орус тилни,
Тау тилни учуз этдик,
Ёсюп келген тёлюню
Орусча сёлешдирдик.

Ана тилин ташлагъан
Миллет шартын этер тас -
Ёз анасындан къачхан
Ёге ана бла онгмаз.

Элледен арбаз тойла
Кафелеге кёчдюле -
Бир столда олтурдула
Келинле бла киеуле.

Унутдукъ намыс-тёре,
Ырысхыгъа жан атып.
Намыс болмагъан жерде
Болмаз дейдиле насып.

Халкъны тёрели динин
Тарт-соз этдик къадалып,
Аны орта ёзегин
Кёзкёрмезде къалдырып.

Жыр, тепсеу, миллет макъам
Саналдыла харамгъа -
Тин хазнасы болмагъан
Саналырмы да халкъгъа?

Тыш жерледе, тузакъда,
Ата - аналарыбыз
Миллетни сакълагъанда,
Биз нек сакълаялмайбыз?

Бир киши да тюйюл терс,
Бар терслик кесибизде.
Да нек алмайбыз бир дерс,
Анча сынау кёргенде!

Тас этмейик бирликни -
Ма олду керти байлыкъ.
Унутмай ана тилни,
Тау миллетлей къалайыкъ!