Шаир ва хъен

Накь ахварай акуна заз Жамидин,
Кьуна гъилни физвай ам са заридин.

Заз ам пара теспача яз акуна,
За адавай:-«Вун гьиниз я?», -жузуна.

-Зун хъфизва Миграгъиз- зи ватандиз,
Зи хайи хуьр къалуриз и мугьмандиз.

Ана авай аламатриз килиграй,
«Ракъинин муг» къариблухдив гекъиграй !

Гьам гамарин, гьам ч1аларин ад авай,
Акурай хуьр устадарин чад авай.

Мердалидин гелер амай мезреяр.
Зилфикъарни Арбен къекъвей куьчеяр.

Чун Андреян* булахдални илифда,
Са хуп1 яд хъун за мугьмандиз теклифда.

Пуд фур авай халичадин чешнедал,
Са кьуьнт яда, адет тирвал, чешмедал.

Миграгъжуван руша храй цуьквери,
Белки таъсир ийин адан мефт1ериз.

Яры дагъдин хкаж хьана кук1ушдал
Цавуз мукьва хьайла вайзар- кушкушдал,

Аллагьдивай мурад хьтин т1алабрай
Шихнесиран илгьамдикай са к1ус пай.

Сухта хьурай шаирарин мектебдин ,
Агакьдайвал адан къастар метлебдив.

Каспий , Самур виле тахьай лезги я,
Къураматда кьаз к1анзавай к1изрияр.

Ик1 лагьана хкаж хьана цавариз ,
Хъен  аламай чилел  адахъ  ялвариз.

Булутни хъен фена яргъаз,къакъатна
Эренлердихъ. 
            Зун ахварай аватна !

               
 * Андреян булах- Миграгъа  Жамидинан таржумачи Андрей Внукован т1варунихъ янавай булах ава.