Петюня

Демекда, къазмадин хъвалав
Са к1ек авай зирек, ч1улав.

Шумал буйдин к1алуб авай,
Вичихъни къад хнуб авай.

Эверардай ц1угъ акъатиз,
Келледайни бугъ акъатиз.

Лацубуруз гьуьрмет идай,
Муькуьбуруз туьгьмет идай...

Гьик1 ят1ани, гатун юкъуз
Хкаж хьанай са лякь цавуз.

Элкъвезвайди гьаятдилай,
Аквазавай суфатдилай.

Верчер авай серсер хьана,
К1екрай зурба эвер фена.

К1ват1 хъувуна вири тадиз,
Хъияна демекдин к1вализ.

Петюня тир к1екре лак1аб,
Фагъирдизни гузвай азаб.

Кьадарсуз ам зурзаз авай-
На лугьуди аяз авай.

Аквазвай вич зайиф хьана,
Шемп1ини гьеч, са кьиф хьана.

Бес фереди и гьал акур,
Квадардачни айиб, абур...

Кич1е яз к1ек рекьиз хьанай,
Зурзаз-зурзаз виниз хьанай.

Дак1ардай килигна къецел,
Кац къекъвезвай лекьрере винел.

Им вуч къариб амал хьана:
Лекьрез ихьти ажал хьана.

Чилел алай кьейид хьтин,
Аквар гьалда мейит хьтин...

"Ик1 жедани я чан сусвар!"-
Тадидаказ гана хабар,

Ялна къецел, т1урфан хьана,
Хвешивиляй аслан хьана.

Хкадарна лекьре винел;
Акатанавай вичикни хъел.

Я кьей хва кек, вун кек ят1а,
К1еквал ая, зирек ят1а.

Гагь са ч1авуз вун к1ек жеда,
Пишт лагьайла, хенек жеда.

Верчеризни дак1ан жеда,
Килиг гьа, ваз зиян жеда...

Ахъайин гил гьик1 хьанат1а,
Лекь кацин к1аник хьанат1а.

Иесидиз хабар хьанай,
Гъиле авайди к1ар хьанай

Вилив хвена, ацукьайла,
Гадарна к1ар. Галукьайла

Ярхар хьанай, кьена къачах,
Куьтягь иналд лекьре к1валах...

Ингье к1екре зурламишна,
Гьараяриз башламишна,

Лап вичин гьа терхи ванцел,
Элт1ишариз вири вичел:

"Нихъ ават1а ч1уру фикир,
Гьа ихьтинд я адан эхир.

К1ур гуда за, кук1вар ийиз,
Къармахривди патар ийиз.

Петюня туш, аслан я зун,
Ялавни ц1айлапан я зун!"

Сегьнедихъ са жуьре ава,
К1ек, лагьайт1а, гъуьре ава...

Рик1ел хтай ч1авуз хъуьрез,
Мад хьайивал лугьун за квез.

Авазвай к1ек фурсар ийиз,
Хкадариз, гьараяриз.

Лекьре винел ацукьзавай,
Гагь далудихъ алукьзавай.

Легьзе вичиз хкудзаавй,
Абур виниз акъудзавай...

Гьардаз вичин са т1ул ава,
Гьа т1ул хьтин акьул ава.

Эхир чир хьун хъсан кар я,
Тахьайт1а ам агъур пар я...

Ингье жабдиз акъатна ам,
Къудгурла мад ахватна ам.

Лекьрел хъсан алукь хьана,
Руфунихъ пис галукь хьана.

Руфунарни сад я вири,
Авайди я гьа са ери.

Саданди я шешел хьтин,
Муькуьдандини цел хьтин.

Илисайла нефесдин сел,
Руфунай акъатна къецел.

Туьтуьхдихъ са азар ава-
Зурнадиз ам ухшар ава.

Акъатна сес пара яман,
Фагъир к1екрен квахьна аман.

Кич1е хьайла галтад хьана,
Гьа инал рик1ни пад хьана.

Фикир цей: ахварай йифиз
Атайла сес лекьрен, к1евиз,

Бес жедачни пис хьайибур,
Петюня хьиз, кис хьайибур.

За вуч лугьун - фурсар мийир,
Гьар са кардихъ ава эхир.

Петя хьтин к1еве тахьуй,
Кич1евални хиве тахьуй.