Уггар т1ехдика!

Цомгуш  хилар а хезна, вахара  сихвелла,
Хьажа-х1отта йовхатар йоккхачу стагана,
Маьнге  улле хиъна  совг1аташ д1аделла,
Хьаьстира  иза там а беш къеначу дагна.

Ва, ма безаме а йуь-кх, хьан  йеха ч1аба,
Къоналлехь  хьо  т1еххаза йара ма бахар,
Алахь, хеттира ас, сий долу, хьоме  Баба,
Маре а ца йодуш, х1унда даг1ийти дахар.

Суьйренга кхачарха, йехха шерийн йорта,
Шек йац хьаьнг-хьаьнга а маре ца йахана,
Элира цуо йолуш, захалонаш дара шорта,
Дуьйцур ду хьуна, цхьалла йисна бахьана.

Жима йолуш бара, дукха нах т1ехьийзаш,
Деший-детий д1аэца, йола бохуш доьхуш,
Корта бацара царах цхьаьннах а хьийзаш,
Сайн дагахь уггар т1ехдика к1ант лоьхуш.

Цхьана дийнахь  шовдане хи дан со йахча,
Даго лехна к1ант вара мерза суна воьлуш,
Амма довзар-м дах ца  делир, д1ахьаьжча,
Иза а хиллера, уггар т1ехдика йо1 лоьхуш.

Х1етахь дуьйна хьоза санна  ахб1ешо даха,
Ши шо хьалха везнарг гира айса сатийсина,
Элира цуо ма дохковаьлла  хьоьлла дикаха,
Т1ехдика йо1 а лоьхуш кураллаш кхиссина.

Ишттаниг жима йолуш дуьхьал а ца велира,
Хала а хета тхан тачанаш вовшах ца кхетта,
Безам боцун мареллах жимчохь дог делира,
Догц1ена дуьненах чекхйаьлла, дика а хета! (С) 08.11.23.