Ни яд гуда шииратдин бахчадиз

Ни яд гуда шииратдин бахчадиз,
Безетмишиз, цуьк алахьай хунча хьиз.

Шукур Аллагь! Къелемни чар дуст хьурай,
Гьар са ц1арц1е акьулни намус хьурай.

Хийир-дуьа гьар са ч1авуз суза я,
Секинарун нефс бедендин гъаза я.

Т1уб тк1уьриз килигарбур мад жеда,
Эвел-эхир ужуз амал яд жеда.

Эхирдалди чуьнуьх жеда, пис хьана-
Мад вуч ийин, арайра иблис хьанай.

Чир хьанайт1а, кардин эхир мус жедай,
Къацу хурал ярхар хьана суст жедай.

Гьар амалдихъ са кьил ава, девле хьуй,
Уст1ар тахьайт1ани хъсан фяле хьуй.

Буш макьамар, гьараярни пара я,
Тай хьайибурни, гьак1 вара-зара я.

Кар вине кьаз к1ан ят1а ваз хийирдин,
Темпел жемир, ц1алц1ама ц1ар шиирдин.

Жуван акьул, жуван намус гъиле яхъ,
Энгел жемир, куьмек патал кьибле яхъ.

Илгьам атай келлени са бустан я,
Лезет къачуз жеда жувал гьейран яз.

Женнетдин багъ килигналди тух жедач,
Т1арам нехиш тахьайдакай рух жедач.

Къизилдикай авур са шеъ - къизил я,
Къизилдалди кхьей зат1 - ам шикил я.

Гьар са шикил манадалди багьа я,
Мана хьайи эсер хъсан дава я...

Гьяркьуь рекьяй фида, ахмакь тахьайт1а,
Шит ийида, гагь хатадай галайда.

Яб гумир на: алайди са вяде я,
Галай язух касни ажиз бенде я.

Умуд ая Халикьдал на, ялвариз,
Умун хьана, гьар са ц1арц1е тикрариз.

Авайт1а чахъ зигьин, яргъаз аквадай,
Фагьум-фикир ийиз чунни рахадай.

Гьайиф, чи мез кьат1унрилай вилик я,
Гьак1 хьайила чи яшайиш к1аник я.

Усал к1валах кутугай хьиз аквада,
Куьт келледин кесердикди рахада.

Жуван гъалат1 чир хьайит1а хъсан я,
Чир тахьайт1а айиб мийир - инсан я.

Вине кьурт1а авамвал, лап силис я,
Эхир тахьайт1а, виридазни пис я.

Серкер тахьайт1ани хинк1ал ягълу я,
Вуч ят1ани, ам гьамиша т1ямлу я.

Гьар са касдиз к1анивалун залан я,
Алакьайт1а - ашукьдин эрзиман я.

Къалам гъиле къачур ч1авуз, шаирдин
Кьилиз къведа фикир-фагьум хийирдин.

Эхир сад я - жигъирарни агъзур я,
Са жигъирдай вилик фин вун мажбур я.

Агъзур жигъирда къекъведа хиялар,
Агъзурни сад гьял ийида суалар.

Намусдини кьас ийида арабир,
Гъил вугана, атай ч1авуз чарабур,

Гъамлу хьана, яргъа рекьиз килигда.
Ацукь тежез, чанта чилел эцигна,

Уфт аладриз вилик фида, татаб гуз,
Гакьадач гьич садни дуьзгуьн жаваб гур.

Белки имай хиве авай буржи я!
Гагь фикирда: "Яда, вун вуч гижи я!

Дуьньядикай кеф хкудур, бес ая,
Къацу хурал, цуьквер кьула мес ая!"