Атама бла анама, Кучмезланы Хакимге бла Хадижатха, атайма
Салам санга, туугъан жерим,
Сыйлы элим - Герпегежим!
Тансыкь болуп, келдим санга,
Бауурча уюп тургъаннга.
Тураса сен Хеу бойнунда,
Къалын агъачны къойнунда.
Иги бла айтылгъан атынг,
Адамларынг - созгъан алтын.
Элни огъары жанында
Элли сегизинчи жылда
Атам, анам юй салдыла
Халал къыйынлары бла.
Кюн жарыгъын мында кёрдюм,
Жашау жорукъгъа юйрендим:
Таза ниетни тутаргъа,
Ким да болсун, хар адамгъа.
Бу юйчюкде - насып жылла,
Анам айтхан бешик жырла,
Атам берген жашау дерсле,
Алты тюрлю сабий кёзле.
Герпегежде ата юйюм -
Жаным-тиним, айым-кюнюм,
Келдим ашыгъып узакъдан,
Сау тургъанча анам, атам...
Герпегежде ата юйюм
© Copyright: Аминат Рахаева, 2023
Свидетельство о публикации №123110606997
Свидетельство о публикации №123110606997
Рецензии