Физва уьмуьр, йикъар, варцар
Гьа са гафар, гьа са чIалар
ЦIийи кьилелай гьар са чIавуз
Гуз жузунар чилиз, цавуз
Вуч хьана чаз, я лезгияр,
Я Давудар, я КIирияр
Я ТIигьир, Хьилар, Хуьлуьхъар
Ахцегь, Кьурагь, Крар, Кьурушар
Кьунван кIевиз чун ахвари
Душманд верцIи, мах чIалари?
Икьван жедан ванер агъуз,
Чарад чилиз Ватан лугьуз,
Физва рекьиз стха, рухва
ЦIай элуьхъиз чпин къула
Гуз чан вичин лезги хци
Хьурай гьикI зи рикIиз хвеши?
Акваз ихьтин кIвалах чIуру
Жедач завай гатаз хуру
Ийиз дамах фей йисарив
За жува тавур крарив
ГьикI кхьин за хъсан гафар
Акурди ятIа чIулав тапар?
ХъуьтIуьн вацI хьиз чун чIагана
Са чкадал гьакI датIана
Къваз авунва, са кам тижез
РикIер куз-куз тапан яз мез
Алатайди чкIиз, ктIиз,
Къенин йикъар - буьркьуьди хьиз,
Къвезмай чIавар - сурар мичIи,
Гьиниз гъида чун чи рекьи?
Вуч хьана
© Copyright: Джейхун Амирханов, 2023
Свидетельство о публикации №123100502732
Свидетельство о публикации №123100502732
Рецензии