Р. Гамзатов. Берегите друзей - на табасаранском яз

                Расул ГЬЯМЗАТОВ

              ДУСТАР УЬРХЯЙ

Аьгъяди гъуз дуст-душманвалин кьимат,
ГъалатI шул, йиз дуст, дишла апIрур диван.
Белки, хъял ктубчIвур, улдубчIвси герен вахт –
Гьялак махьан хатур ккибтуз яв дустран.

Хъа мумкин ву дустру, учв духьну гьялак,
Хабарсузди увуз гиран ктапIуншул.
КIул`ин гъибиснуш тахсир кайивал чак,
Дугъаз гъалатI кIваин апIуз хай даршул.

Инсанар, кьаби шула ухьу вари,
Артухъ гъягъбахъ ихь уьмрин йигъар-йисар,
Шулухьа дустар рягьятди дургури, 
ЧитиндитIан дихъдархьуз цIийи дустар.

Хъабхъраш вафалу гьяйвнин гьадабтIу лик,
Яв гьяйвнин ваъ - рякъюнуб ву тахсир му.
Гьялак махьан багьна кипуз яв гьяйвник –
Гьялак махьан дишла гьюдюхюз думу.

Миннат вуйиз, аллагьисан, инсанар,
Нач мапIанайчва ичв уж`вал улупуз.
Жил`ин дустар думукьан гизаф алдар:
ГучI апIинай гьякьикьи дустар дургуз.

Узу жара къанунарихъ хъахънийза,
Зяифвал усалвал гьисаб апIури.
Уьмриъ гьадмукьан дустар ккатIахьнийза,
КкатIахьнийзу гьадмукьандар дустари.

Дидхъан ужуб-харжиб гъябкъюнзуз гизаф.
Ахъу дюшюшдиъ дараскьал рякъяриъ,
Швумал гъахьнийза гъапIубдиин талаф,
Мюгьтаж гъахнийза гъудургу дустарихъ.
 
Хъа гьамус улар хъайиз учвухъ вардихъ,
Саб фила-вуш узу ккунди гъахьидар,
Гъузнайидар узу хил алдадабгъди
Вая узлан  хил алдабгъуз дархьидар!

          ИлтIибкIур Э. Аьшурбегова