Им буьркьуьдан ягъун туш

ИМ БУЬРКЬУЬДАН ЯГЪУН ТУШ

Дуьшуьш авач, къвен тийидай кьилерал,
Сад Аллагьдин Кьадар ятIа, чидач заз.
Садбур - кьецIи, садбур буьркьуь – вилерал,
Сагъламвилер куьз ятIа дар, чидач заз.
Гьар гьикI ятIан, хуьз алахъин инсанвал,
Инсансузвал – сагъар тежер азар я.
Чир тахьайтIа, вичиз авур хъсанвал,
А касдикай Аллагьни кваз бизар я.
Кхьин тийиз, шумудни са йиса за,
Эх авунай буьркьуьдакай кьиса за.

Са маканда, муькъуьн кьиле, тIалабиз,
Пул кIватIзавай, вичиз вегьей, буьркьуьда.
Вични буьркьуь са кесибдай гьисабиз,
И буьркьуьди ахтармишда экуьда.
Са вахтулай, кIватIай пул кьве паталди,
ТIалабайла, кьил къакъажна буьркьуьда.
АкъвазайтIан, вил эцигна гаталди,
Пай тийирди, гьисс авуна экуьда.
Аллагьдивай, тIалабна, дуьз галукьун,
Къванер хьана, къвез буьркьудал алукьун.

-Им буьркьуьдан ягъун туш, заз чир хьана.
Ма, жуван пай вахчу завай, атана.
И кIвалах заз, икьван чIавал сир хьана, -
Лугьуз ада, вичин келле гатана.
-КьецIиди я, буьркьуьди я, - лагьана,
Гьич садани квадар тийин инсанвал! –
Буьркьуьдавай, гьахъ вахчуз кIан тахьана,
Вичин патай бахш авуна хъсанвал.
Гьихьтин дуьшуьш атайтIани кьилерал,
Инсан тирвал хуьз алахъин чилерал!