Шииратдин алемдиз

ШИИРАТДИН АЛЕМДИЗ

Зун гъайибур шииратдин элемдиз,
Сад-Эмин я, сад хуьруьнви Сулейман.
Элкъуьрна зун, емиш гъидай къелемдиз,
Руьгьда-Эмин, рикIе-иви Сулейман.

Кьвед, кьве къуьнел чинер хьана, ала зи.
Рекьер, хвалар къалур ийиз, вилик физ.
Абур кьведни гьатнава гьар чIала зи,
Лезгистанда, Лезгинкадин кьуьлуьк физ.

Эминарни Сулейманар авай чIал,
Гужлу вацI я, и дуьньядин чIаларик.
Сад Аллагьди ракъурнавай цавай чIал,
Вал, чIур тежер имандал хьиз, ала рикI.

«Илиф!», «АлцифI» - лугьудай чIал мугьманриз,
«Мугьмандин» кIвал галай гьар са кIвалерихъ,
Чин атIумна, тамашдайбур душманриз,
Вуж агакьда, гьуьрмет вине эллерихъ?

Бес ихьтин халкь, чебни къадим тарихдиз,
Лезгинка кьуьл багъишнавай миллет яз;
Демерани, женгера туьнт къилихдиз,
Зегьмет кьунвай имтигьандин билет яз.

Садбур – алвер, садбур тирла куьчери,
Са бязибур, фу недайбур тапаррал:
Чан зи миллет, эбедлух хуьз хас ери,
Куьн къачуз жеч, къилинжрални тупарал!

Сажидиназ чида къадим тарихар,
Им макан я, авай жумарт рухваяр.
Зи миллетдиз кIан хьайид туш синихар,
Сагъ хьурай чеб чи чIал хвейи архаяр!