Чун мажбур я

ЧУН МАЖБУР Я

ГьикI жеда чаз, чилел къекъуьн, эркин яз,
Кьезилдаказ нефес къачун, секин яз,
ГьакI цавалай аватнавай кьисмет хьиз.
Къадир хьана, гьар са къачур камунин,
Кваквар вегьей саяхъ, храй гамунин,
Абур, жемир, ваз багъишай, зегьмет хьиз.

И бахтлувал, и азадвал хиялрин,
Къугъунар хьиз, гьеле гъвачIи аялрин,
Аквада ваз, и дуьнья, са женниет хьиз.
Кьилел гъетер, вацра экв гуз, кьилелай,
Экуьн кьиляй, вири фена рикIалай,
Рагъ экъечIда, йифиз авур, туьгьмет хьиз.

Чун мажбур я, вири хъсанвилериз,
Икрам ийиз, Сад Аллагьдиз, эллериз.
Цаварини, чили гайи къимет хьиз.
Къадир чир хьухь, вун халкь авун, инсан яз.
Яшамиш хьун, са бахт тушни, хизан яз?
Вири халкьдин, са хъсан тир, адет хьиз!

Сажидин, на ая жуван фикирар,
Хийирдиз я, авур кьадар зикирар,
Сад Аллагьдиз авур саягъ минет хьиз.
Жувалай дуьз къалур ая кIвалахар,
Михьи ийиз, шииратдин булахар,
Къалура халкь, адалатлу миллет хьиз!