Виридан вил ракъинал

ВИРИДАН ВИЛ РАКЪИНАЛ

Виридан вил ала, гьелбет, ракъинал,
Вири аслу я чаз гузвай экуьнлай.
ТIалаб ийиз, Сад Аллагьдин рикIинал
Физ жедани, гьар са йикъан экуьнлай?

ТIалабчивал, къулайсуз тир кIвалах я,
Жез амай кьван къарур тийин ажизвал.
Зегьметдалди ялзавайди – булах я,
Зегьмет чIугун, я чи кьилин винизвал.

Са-са йисар, кьурагьбур жез, дарвилер,
Жеда, гьелбет, тIебиат я чIал течир.
ЧIимел йисар, рикIериз гуз тIарвилер,
Жеда, гьелбет, тIебиат я чIал течир.

ГьакI хьайила, халкь авунва инсанар,
Сада садаз гун паталди куьмекар.
Гьарда вичин кIвалах ийиз хъсанара,
Гьа са чIавуз, хьун герек я зирекар.

Йисан пуд вахт, тек са хъуьтIуьн паталди,
Алахънава, тахьун патал дарвилер.
Зегьмет чIугван, гьалал фу тIуьн паталди,
Ерли тахьун патал рикIин тIарвилер.

Я, Сажидин, валай гъейри и крар
Чидай ксар, тIимил аван дуьньяда?
Гьайиф кьванни къвезвач жал ваз и чарар?
Шаирвални ваз ганвай са тIуьн ятIа?