Дуствиликай риваят

Дуствал – пулдихъ затI я къачуз тежедай,
И кар течир вуж ятIа, ам авам я.
Дустар кьаз кIанз, вафалубур хъижедай,
Алахъунар, акъваз тийиз, давам я.

Йисан кьиляй кьилиз гатфар тежер хьиз,
Дуствални са вахт я чими гатфарин.
Вирт кIватIалдай чIавуз, халис чIижер хьиз,
Сагьибар жен краринни гафарин.

Дуст кьун – регьят, хуьн четин я лугьуда.
Герек къведач чирун вири сирерни.
Четинвилер са-сад, са-сад алуда,
РикIин тIарвал, жезватIан вал хирерни.

Четин чIавуз герек ятIан дустарни,
Стхаяр таз кIан жемир ваз пашман яз.
На вун гьисаб ийизватIан, устIар яз,
Бязи дустар, аквада ваз душман яз.

Им ваз лугьун туш, дустар кьаз кIан жемир,
Дустарни яхъ, жувни къалур инсан яз.
Дуст авачир, вацIай авай къван жемир,
ТуькIвена кIан ятIа крар хъсан яз.

Сажидиназ авайди тир дустарни,
Меци агуд, рикIи къакъуд ийидай.
РикIин къене авай чIуру къастарни,
Дуст, дуст лугьуз, - рикIив агуд тийидай.