Узягъ я халкь рухвайралди кьегьал,
Агъзур (йи)сарин къагьриманар хьайи.
Душманрикай хвейи лезги магьал,
Халкьдин турарни къалханар хьайи.
Багъишна халкьдиз цавари вили,
Уьтквем игит хайи чилин панагь,
Т1вар гана адаз халкьди Шарвили,
Хкяна эллери адакай пачагь.
Намус, виждан пайдах тир игитдин,
Хайи чил хуьз дагъ тир ам далудихъ,
Гьар са карда ам хьана бажитди,
Чуьнуьх хьанач къванерин парудихъ.
Женгер тухуз, барбат1айла душман,
Элкъвез хъхьанач мад пак лезги чилел.
Цуьк акъатна дигана чи ватан,
Шарвилиди шадна даим чи эл.
Шарвилиди тунай халкьдиз веси,
К1еве гьатайла эвер гун вичиз,
Хьанач лезги иви квайбур аси,
Хьана игитар вафалу чилиз.
Шарвили хьана женгинин дамах,
Зегьметдани шадвилерин аваз.
Шарвили я азадвилин пайдах,
Чи халкьдин кьилел лепе гуз къугъваз.
!7.06.2023.
Шарвили я азадвилин пайдах
© Copyright: Нажмудин Шихнабиев 2, 2023
Свидетельство о публикации №123061706410
Свидетельство о публикации №123061706410
Рецензии