***

КЬВЕДАР

*   *   *
Лугьузвай гаф рик1ивай хьиз кьазвач1а, лугьумир на.
Ч1алахъ авун алакь тийиз, жуван субут шулумир на.

*   *   *
Муьштериди, бегел тежез, к1вачин къапариз килигиз,
Лагьана:  амайт1а чахъ уст1арар , ли гудай шаламар  илигиз …               

*   *   *
Гъуьрчзават1а, гъуьрчехъанди, гарун хура гьатай хьиз пеш,
Тулади кьунвай, галат хьанваз, тапацрикай хкатда  леш.

*   *   *
Нехирбандиз чизвачт1а, хуьзвай мал-нехирд кьадар,
Тахтай малдин иесиди къадайди я, ч1ана, хабар.

*   *   *
Пуд ч1ал чизвай «меденидиз» тийижиз хьана дидед ч1ал,
Гьа ч1аларин къадир хьунал, гьунарзавай хьиз  тир усал…

*   *   *
Пул кткайда к1вал эцигна, хуьруьн мулкуна, кьакьанда.
Бубадин секуьл к1вал, а касдин, аваз хьана аск1анда.
 
*   *   *
Чилер ава т1ебиатдиз ч1агурнавай, сегьне хьтин.
Дагъд вац1ариз  чкаяр ава, лал кьенваз, дегьне хьтин.               

 *   *   *               
Адет яз, хзан патал, артух чрада къафун къажгъанда,
Тух тахьайда лугьур кьван я: «ахкъуд хъия, мад хк1анда…»

*   *   *   
Кхьида лугьуз,  чидай ч1алал, касди кьуна гъиле къелем,
Са ктабдин иес хьана, харжна ада чарар секлем…
               
.*   *   *
Буьркьуь хук гваз, виринра, тамагь техуьз хьана нефсет1.
Мел-мехъерра, межлисра гьа нез хьанай… чукуриз т1вет1.

*   *   *
К1улан залан пар хьтин, зигьиндизни ава  пар.
Тафавтдиз килигай, абруз гузва мажиб кьадар.      

*   *   *
Кьац1аллай кьвати, вилиз такваз, рик1ел текъвез, умун тир.
Кьац1 михьдайла кьват1идавай медалар акуна хтулдиз…      

*   *   *
Кусруь туьк1уьрнай бади, т1алабун яз бадедин, варар патав.
Баде ялгъуз ацукьнава, хва, хтул шегьердава, садни гвач къвалав…

*   *   *
Уьмуьрда чун тамарзу я:  акун патал мурадрин кьадар,               
Гьа крарин  къайгъудари, «мадариз», алудзава къар.