Чола махмаран йеха коч текхайеш,
Ц1ечу мачин лекха к1ажаш детташ,
Лела йо1 ц1естан к1удал техкайеш,
Къайлаха сан корах б1аьрг бетташ.
Кхоьру со тамехь йо1 йезайаларна,
Хьалххе хаьа х1ун хира ду т1аьхьа,
Кхоьру безамо гуранна чулалларна,
Синхьовзам хиларна дукха къаьхьа.
Цкъа хьостуш йуьха човхаеш ойла,
Безамо хьийзаво г1айг1ане вожош,
Синтем бойуш, ма-хетта деш дола,
Къизаллица чов хилла дог 1овжош.
Х1инцалера т1ехкура духар духуш,
Ца вогу, йо1ан хьалхахь д1ах1отта,
Меллаша цунах маса б1аьрг тухуш,
Говзачу къамелаца, хьовзош корта.
Безаман варше сих лур вац г1орта,
Лазаме сирхаташ схьаийзо ду хала,
Цуо со т1евехча, карзахболу корта,
Атта дац цуьнан олаллех азатвала,
Чола махмаран йеха коч къегайеш,
Ц1ечу мачин лекха к1ажаш детташ,
Ма лела йо1, со безамах хьегавеш,
Къайлаха сан корах б1аьрг бетташ! (С) 28.05.23.
К1удал
© Copyright: Муса Вольф Айдамиров, 2023
Свидетельство о публикации №123052804708
Свидетельство о публикации №123052804708
Рецензии