КЪЕЛЕМ
Вун зи къелем, рикIин сирдаш,
Кхьинрикай икрагь тахьай,
Девитдикай чIугваз тур «каш»,
Шумуд санбар чарар харжай.
Гьа эвелдай икьрар хьана,
ЧIал-кхьинрал пайгар хьана,
Дидед чIалан заргар хьана,
Санал яцIа хьана, къелем!
КIвалин цла атIанвай къул,
Далу гьадахъ, янаваз кIул,
Чим гуз, къахчуз чандавай фул,
Хъуьт1уь чка гана, къелем.
Хъен гузавай багъдавай тар,
Стол кIаник, адал чарар,
ЧIуриз, туькIуьр хъийиз цIарар,
За девитдив кана, къелем.
Секин, динж тир чкайрик чун
Къекъвез хьана, квачир рахун,
КIватнавай кьван фикир, кьатIун,
Бегьер гъирвал цана, къелем.
Уьмуьрдикай кхьиз тур зав,
Кьисметнаваз талукь кьве чIав,
Къилав гуз таз хцивилин вав,
За кьуд ктаб кхьена, къелем.
Фикретан руьгь хьанвач къуьруь,
ХьанватIани камар куьлуь,
Мензил ава яргъал, куьруь,
Тамамарда гьана, къелем!
***
© Copyright: Фикрет Хидиров, 2023
Свидетельство о публикации №123052600024
Свидетельство о публикации №123052600024
Рецензии