Ст1ал-ст1ал гьекь авахьиз пелекай,
Тум кутазва ник1е вичин лежберди.
Ст1ал-ст1ал иви к1вахьиз рик1икай,
Яракь мягькем кьазва гъиле аскерди.
Рик1ни жигер, гьекьни иви какахьиз,
Гафар-ч1алар теснифзава шаирди.
Чи уьлкведин дердер-гъамар теспягь хьиз,
Туп1алайиз эзберзава шаирди.
Эхи жезвач табни буьгьтен рик1ивай,
Фитнечидин хъуьч1уьк хьанай партбилет.
"Яргъаз къекъеч1 хаин авай рекьивай",-
Дугъри касдиз шаирдинди тир минет.
Перестройкад керекулди хиве кьур,
Гьуьруьятни патрумдаш алайд хьана.
Гьар гачалди, хан я лугьуз,гузва к1ур,
Сулейман, на уьлкведиз лагьайд хьана.
Гъед куьк1вей бажарагъ ви камалдин,
Къе яргъарай аквазва гьуьндуьрдаваз.
Дар хьайит1ан, генг хьайит1ан чи халкьдин,
Рик1елай фич даим ви чуьнгуьрд аваз.
Регьберарни, тарихдин кук1ва хьайи,
Девиррин гар галукьнамаз алугна.
Тек Сулейман, Агъа-Ст1алдал хайи,
Сагъ я къени, дагъвид бармак алук1на.
Сулейман хиялдаваз
© Copyright: Нажмудин Шихнабиев 2, 2023
Свидетельство о публикации №123051605952
Свидетельство о публикации №123051605952
Рецензии