***

ЗИ  БЕНДЕР

Заз ава са *чандин дафтар,
Бенд-баядриз чка ганва.               
Ван- сес галайбур я гафар,
Манияр патал кхьенава.


Т1имилзавач абрун кьадар.
Мас-къиметдик ква гьар са ц1ар.
Секин хьун патал зи дидар
Мизамдава, гуьнгуьнава.


Кутаз тазвай гьевес,  ашкъи
Руьгь тухардай к1анивал я хьи!               
Жеч, абурал, тежерд рази,               
Фикир желбдай зендинава!


К1аш акьазвай к1авузардай
Акъатда хьи ц1елхемдин ц1ай…
Гьа саягъда ашкъид гатай
Мугьуббатдин *бендинава.
               

К1елдай ч1авуз бендер са къат               
Гевил жезва авазра гьат.
Гьайиф текъвез ванцин такьат,            
Кьве яб тухур денгинавач…   


Кутадач хъел, ийидач т1ар
Хъуьтуьл гьалдинбур я ч1алар.
Элкъвез-хквез гьа са гафар
Тахьун патал женгинава.               


Са шумудра  межлисд к1вализ
Аватна зун, бендер к1елиз…
Ак1 жедай заз, бягьсер ийиз,
Зун мазанрин деминава.


Агьил чагъда авай Фикрет,
Гьикьван тариф на авурт1ан,               
Чир хьухь, анжах я ваз масан
На лугьузвай ч1аларин ван!               
Жемир акьван  дердинаваз!


2011. 09.               
               
*Чандин дафтар – къейдер, рик1ел хкунар, маса кхьинар жедай книжка.
*Бендинава; бенд хьун – кан хьун; канивал хьун  (влюбляться)