***

КСАР
(айгьам)

Сад хьтинбур туш кьван ксар,
Чпин рик1 тирвал я абур.           .               
Къилих, синих жедач  ухшар:
Сад жед залан, сад такабур…


Са кас ава, фадлай чидай,
Такур кьасар гьич тийидай,
«Огьооо!..» - ийиз, салам гуда.
Рахунрик ква шуьк1уь ван-сес. 
               

Чи патанд я, вични чакай,               
Алук1-галукь туш гьа чк1ай!
Амма къилих я хьи кисай,
Валлагь, рахаз къведач гьевес.   


Туп-гуп гудайдини ава:
Хиял жеда ирид цава…
Чуьнуьхардач, гьакъикъат я,
Гьаман я чи яргъал мирес.


К1вал авай  туш къунши тежер.
Захъни ава, т1ул эйбежер…
Камай кьан лагь: «мийир, мижер…»
Сиришта квач, я хьи тентес.


Чирхчир я шувакь, хъукъвай,
Уьмуьр залан кеспидик хьай.
Фагъир хьиз туш, мердвални квай                .
Гъил ахъа - заха кас я, бес! 


Квехъай хьайт1ан авай хабар,
Крар чидай, пара амалдар,
Рахунар гва рик1 ийир т1ар…
Хва т1екьей кас я хьи *т1екьес!


Т1вар я Бедел, чидай кас я
Папахъ галаз къекъвен хас я.               
К1валин крар лап асас я!
Къуш хьтинди я – чка къефес.


Вич са язух - бенде инсан,
Мез галк1идай - лалак1 гьак1ан.               
Уьмуьр гьална лувак папан…
Заланз къачуз ава  нефес.



Ксар ава, чидайбур яз,               
Аямдив кьур партал алаз,                .               
Къекъведа чеб дамахдаваз               
Алук1на пенц1*,  шляпа - фес.

               
Къерехдик квай кас туш Аран,
Гьадахъни  ава  фагьум хъсан: 
Ксарик квай буьркьуь  нукьсан,             
Чир хьун кумаз  кьада  лишан,
Тфенгдай хьиз ягъда серес.


*Т1екьес(ц) – чин алай, рекьин рик1ел алачир, чан к1евиди
*Пенц1- алай аямда алук1завай рав хкатай шапка.