***

ЧИР ХЬУРАЙ


Чуьнуьхардач, ийида чир:            
Инсан я зун, къилих сая.         
Заз авай туш ченебан сир,               
Я са арза: кьея-кая...               
               

Къулал жеда къажгъан, ягълав…
Квачиз хьайт1а абрук ялав,
Гьис ацукьна, жеда ч1улав.
Ялав тирди чир хьурай зун.


Перемд хелер жеда кьуьнтел
К1валахдайла багъда, гъенел…
Курум-курум гьекь жез пелел,               
Жафа ч1угваз чир хьурай зун.


Рахаз к1анда адалат кваз.
Лал гъавурда алахъда тваз.
Кьел квай гафар - лезет я заз,    
Шит туширди чир хьурай зун.


Заз илгьамди  гузва ашкъи               
Ч1алар патал кеврек, верци.,.               
Фикир, кьат1ун тушир наши               
Кхьинрик кваз чир хьурай зун.


Гьалтай ч1авуз зал терс менсеб
Чирзава за макьсад, метлеб...
Сивел къвеза жуьреба себ.
Себ гвай кас хьиз чир хьурай зун.


Хайи чилин  к1анда гьава,
Зи уьмуьрдиз я ам сафа!               
Авач заз чил ам кьван багьа!               
Вафа аваз чир хьурай зун.


Кьулан вац1ун ятарин сел,
Чизва, ам я ван алай шел…
Часпардикай къвезва заз хъел.
Хъел-ажугъ кваз чир хьурай зун.


Авунват1ан и пад, а пад 
(Ахьтин гьалдал халкь туш кьван шад!)               
Сад хъхьун патал дад-бидад
Ийизвади чир хьурай зун!


Садахъни зи квай туш гъараз.
К1анда терез хьана тараз*…
Хабар кьурт1а, чараз-чараз:
Патанбуруз сир жеда зун!
Жуванбуруз чирда за зун!

*Тараз – терездин хелер са гьалда-гьавада хьун.