***

БИНЕ  ХЬУН   Я


К1анзавайди девирдив сад
Тухуз жедай алакьун я.
Нетижейри ийирвал шад,
Агалкьунралд к1валахун я.               



Жуван халкьдин жен къайгъуда:
Мекь ваъ, чим хьурай далуда.               
Рузи, няметри... къалу(р)да
Халкьдин агьвал, - дамахун я!      



Четин кар гъиз жеда ч1алал,
Тахьун патал а карда къал.
Векил ксар, авай  камал,
Герек ч1авуз, к1венк1е хьун я.               



Уьмуьр я кьван т1арвал авай,
Хкаж тежер ппар-ял авай.
Гьялиз жедай кар-гьал авай…
Куьмек гун чи, - хиве кьун я.



Авайди я футфа, гъараз
Адакай жен пара яргъаз,               
Тахсир квайдан дуван акваз…
Гьахъ, бат1ул гьал  ише фин я.               



Дидед ч1ал я - хзанда рахар,
Кьвед лагьай ч1ал - ана тахай
Я, - герек туш маса гафар…
Ч1ал, хзандин, чешне хьун я.



Мугьман к1анид я чи гуьгьуьл,
Мехъер-межлисар туш къуьгьуьлд…
Низ чизавач кьван "Лезгинка" кьуьл?!.
Халкь, алемда, виле хьун я.



Дегь халкь я чун дувул дегьне,
Тарихдик чи квай туш рехне.
Дак1анбурун, ягъиз  тегьне,..
Вилик пад кьун - вине хьун я.   



Ч1иб яна,.. чаз тунва чилер,
Сагъар хъийир адал хирер
Алама. Чахъ ватан хъижер,
 Гуьзет жер гьал, - рик1е хьун я.



Часпаррикай тежен кич1е,
Халкь, нагьахъан, пайнава къе…
Чи мурад, - эрзиман еке,
Сад хъхьана… к1вале хьун я.



Лезги руьгьдин хц1и тир хел    
Хьана вик1егьвал, тунва гел…
Гьахъ-адалат ийидай к1ел…
Уьткем хва, къе,  кьиле  хьун я.



Садра ганвай уьмуьр я чаз,               
Тефирай ам мурад амаз
Гьич садахъни… Кьилинди яз,               
Ватан лугьур бине хьун я!