Ч1алар ава агъзурралди дуьньяда
Гьар са миллет вичин ч1ал гваз уьзяда.
Лезгийризни вичин дидед ч1ал ава,
Къе лезгидин хура вучиз т1ал ава?!
Сулейманан, Эминан ч1ал кваз такьаз,
Хайи ч1ал вучиз ят1ан усал акваз,
Чара ч1алаз кьадарсуз на гьуьрметиз -
Хайи диде къекъведа вахъ туьгьметиз.
Рекьидайла гвачиз хайи лезги ч1ал,
Вун кабабда Эминан ц1арарин ц1ал.
Ч1ал ватан я,гьам я хайи чилни цав,
Негьиз тамир вун багърийрив, чарадав.
Лезги ч1ал ви къул я, ам виждан хьиз хуьх,
Тапан хиялар, гьиссер вири чуьнуьх,
Лезги хьухь,ч1ални ватан, диде чидай,
Сурун къванцел " халис лезги тир" кхьидай.
Бине лезги, эхирни хьуй лезги яз,
Ви веледриз аманат хьуй дуьзгуьн яз,
Лезги мани, лезги ч1ални веси яз,
Тур веледриз, фал кьин кьуна, лезги яз.
Ч1ал хуьх
© Copyright: Нажмудин Шихнабиев 2, 2023
Свидетельство о публикации №123012802394
Свидетельство о публикации №123012802394
Рецензии