Iдучы на IT-курсы, якiя так ня сталi працай

Сонца са звонам
выкатываецца
шарыкам мармуровым
праз вузкі пад'езд
і выходзіць
вонкі

Белмаркет хрыпіць, як хворы мамант
У яго баліць жывот
Ён праглынуў рынак і кансерваваны дабрабыт

Нізкія вокны дамоў
адлюстроўваюць
чужое жыцьцё
гэтак жа, як і тваё

Апранем маску на воблака
Воблака ў масцы
і без штаноў

Яднаньне брукаванкі
й пластыкавай крышкі
з дзіркай, праз якую
існуе трубачка

Шторка маршруткі
працісківаецца праз сьмерць
Усе рэчы
праціскваюцца праз сьмерць

Лодка жаночага цела плыве да вадаспаду маладосьці

Сьвет падзяляецца на дьзве часткі: дзе ёсьць чырвоныя цюльпаны, і дзе іх няма

Л - проста літара л, націснутая выпадкова

"Методологически это потрясающая вещь"

Фарфоровый слон трубит

Вечар уразаецца на вялікай хуткасьці
ў голуба, што ляціць
нізка над
адчаем існаваньня

У  сёньняшняга жыцьця
добры густ:
ён падобны на мой

У сяньняшняга неба
прамая постаць

Неба плаціць шэсьць даляраў
плоту і футбалістам за плотам

Неба сушыцца на вяроўках сэнсу, пакуль ізноў ня ўзьнімецца на флагштоку раставаньняў
над плошчай перад палацам
піянераў ды піянерак

Адпрасаванае далонямі,
і яшчэ цёплае,
трохі зьлінялае ад сьлёз,
але ў цэлым прыгоднае
для карыстаньня

Неба гунаў
шукае цябе вачыма.
Не адварочвайся -
пачынаецца імпрэза дажджу