Евгений Онегин, гл. 111, ххх1 стих. Перевод на лез

 
   Онегиназ Татьянадин чар

За кхьизва ваз - вуч к1анда мад,
Завай мад вуч лугьуз жеда?
Ихтияр я авун инад,
Зун алчах язкъалуз жеда.
Анжах хъухъ зи рик1икай яд,
Инсаф ая: бахтсуз кьисмет,
Ва зун вуна тадачхелвет.
Кисун хьана эвел хиял:
Ч1алахъ хьухь: заз тир ийиб,
Жедачир вун адан сагьиб,
Авачирт1а умуд, са т1ал,
Гьафтеда вун садра акун,
Чи хуьре вун аваз акун,
Ви суьгьбетдиз гудайвал яб,
Ваз гаф лугьуз, ахпа йифиз
Ва мад юкъуз фикир ийиз,
Мус ахквада лугьуз яраб.
Амма ялда архайинвал
Дарихвални хуьруьн ваз хас,
Авач чахъни са гьунарвал,
Вун атун я чи шад либас.

Куьз атанай вун чи к1вализ,
Хелвет хуьруьз, рик1еллачир?
Аквадачир вун зи вилиз,
Я дерт-дуьгуьм заз жедачир.
Зи руьгь са аян авачир
За секиндай рик1ин къене.

Заз жагъидай тай-туьш жуван,
Вафалу яз гудай за чан,
Зун эдеблу жедай диде.

Масадаз!.. Ваъ, гьич садазни
И дуьньяда гудач за рик1.
Вун амаз зун масадаз фич,
Худади чун садда гьа ик1.
Вири уьмуьр тир зи замин
И гуьруьшмиш хьунин чун кьвед,
Худа тир чи шерик.Амин,
Зи малаик, уьмуьрдин гъед...
Вун аквазвай заз ахварай,
Кьат1ун тежер,амма азиз,
Килигайла квахьдай кьарай,
Ажайиб сес къведай рик1из
Фадлай...амма ахвар туш им,
Акурла вун, чир хьана заз,
Рик1 буш хьана, чандава чим,
За хиялна: ингье а кас!
Хьаначирни бес заз ви ван?
Раханачни вун зав хелвет,
Ц1развайла шем хьиз зи чан,
Я дуьаяр ийиз тапан,
Дарих рик1из гурла лезет?
Вун тушни бес шикил хьиз, яр,
И легьзе заз авурди дар,
Экв аватай мич1ивиляй
Агатайди зав са бубат?
Вун тушни бес заз муьгьуьббат
Ачухайди зун хушвиляй?

Малаик ян вун зун хуьдай,
Фендигар ян рекьяй къуддай:
Шаклувилин эциг эхир,
Белки им файдасуз кар я,
Ахмакь рик1ин тапан са сир!
Зи кьисмет заз залан пар я...
Къуй гьи ик1 хьуй. Жуван кьисмет
Къедлай за ви гъиле твазва,
Ишезва зун,рик1 куз жаван,
Вавай регьим т1алабзава...
Хиялдиз гъваш:ава зун тек,
Зи гъавурда акьазвач сад,
Акьулди зи кьат1узмач зат1,
Рекьида зун кисна фелек.
Вил ала вал:вун заз килиг,
Зи умудрал на хкваш чан,
Я и ахвар ат!ут1 залан,
Туьгьметдиз зун лайих я жал!

К1ел хъийиз кич1езва кагъаз,
Айибдини къурхуди кьурурзава...
Замин хьурай ви намус заз.
Гьам иман яз къалурзава...

     10.12. 1986-йис.


И перевод школада авай аялрин т1алабуналди авурди. А девирда гила хьиз телевизорар виридаз авачир, телефонрикай хабарни авчир, урус ч1ални аялриз хъсан чидачир. Гьавиляй абурун т1алабун кьилиз акъудна, абуру чпи лагьайт1а, вирида чпиз кхьин хъувунай.