Рекьер ава бахтунихъ руьгь къекъведай,
Яд уьлквейриз тухуда вун кьисметди.
Йисар, вахтар регъвери хьиз регъведай,
Жагъидалди эризиман рак женнетдин.
Анжах агакьдалди кас женнет багъдиз,
Умудрикай руг жеда а рекьера.
Авур кьван минетарни элкъведа дагъдиз,
Цуьк ахъайдач бахтуни гьич рик1ера.
Ирид дагъдин, ирид гьуьлуьн далдадик
Чуьнуьхайт1ан рик1ин сирер деринра,
Са рехъ ава акат тийир баладик,
Хайи чилел хъархъу тарцин серинрик.
Са рехъ ава:яргъини я, куьруьни,
Элкъвена вун хайи к1вализ хкидай,
Виждан тахьуй гьич садрани къуьруьни,
Хайи к1вал я хуз хьиз адак кик1идай.
Рекьер...Рекьер...
Са рехъ ава хайи к1вализ элкъведай...
Рекьер... Рекьер...
© Copyright: Нажмудин Шихнабиев 2, 2022
Свидетельство о публикации №122112100160
Свидетельство о публикации №122112100160
Рецензии