Фикир, фагьум са к1ус кьванни авайдаз
Къадри жеда ашкъи-гьисер ялавдин.
Бахтлу кас я ам садрани тахьайди,
Гуьзел гьисер к1евна к1аник къилавдин.
Заз йифериз эквзава ви къаматди,
Азиятар хкаж хьайла цавариз.
К1ур гайидан ашкъидиз зарафатдив,
Инсафсузвал ашкара я гъуцариз.
Лугьумир заз , килиг таяр-туьшериз,
Заз акур туш ихьтин сад хараб хьайи.
Вилер шехьиз ацукьнава, туьмериз,
Ви дидар за рик1ел хкиз, таб хьайи.
Вуж бат1ул я, кайи ашкъи себеб яз
Къацу багъда тек кьурадай гар хьана.
За лугьун ваз, ви буй-бухах мешреб яз.
Фагъир я зун, жуьгьендиз ухшар хьана.
Чан алачир к1варк1вац1ди суй агъур я,
Зун лагьайт1а, амукьарди руг я са.
Дишегьлидиз регьим, кьат1ун абур я,
Аман зи яр, гьайиф, къабах-куг я са.
Гьайиф Керим, вунни гьавай пуч хьана,
Бахтикъара, к1вач вегьена яргъариз.
Са к1ус кьванни экв такуна мич1 хьана,
Гьатна хура саврухарин, мархарин.
Лугьумир заз, килиг таяр-туьшериз. 74
© Copyright: Магомед Мирзоев Мирзой, 2022
Свидетельство о публикации №122102105742
Свидетельство о публикации №122102105742
Рецензии