Гьуруьдкайни, цававай, рик1 т1ар хьанай,
Ашкъидикай пай ат1айла гъуцари.
Зазни ачух дуьнья михьиз дар хьанай,
Килигзава чинеба ваз, ялвариз.
Яргъи кифер акурлай зун къах хьана,
Элкъвенавай, жавагьир хьиз гарданда.
Ви къаматни заз эрзиман, мах хьана:
Яраб залай кас авач ваз дак1андай.
Гьинай гьатна ваз и ери, бендедин
Язух рик1из себебсуздиз к1ур гана.
Регьмет хьайи, я чан Аллагь, дидедин,
Заз акурди дуьньядал тек сур хьана.
Шумал буйдин ви к1алубдиз тай хьанач,
Гьар гьерекат, гьар са юзун хушдаказ.
Гагь зи мурад, акьул кьвенал пай хьана,
Килигзава ви гелез байкъушдаказ.
Назлу, гуьзел, вун зи метлеб, мурад я,
Ялварзава за ви хушбахт гъуцариз.
Пара к1ан туш, са гъвеч1и дад-бидад я,
На яб гумир чун дак1ан тир ксариз.
Мад вуч ийин, гил зи эхир вай хьана,
Йикъар физва, вазни зарафат я зун.
"Аку садра, хъукъвераг нин тай хьана",
Лугьурбуруз бегьем ягьанат я зун.
Жаннатдикай гьуьруьдизни пар ханай 62
© Copyright: Магомед Мирзоев Мирзой, 2022
Свидетельство о публикации №122101605462
Свидетельство о публикации №122101605462
Рецензии