Садбуруз им аламатдин кар хьана 55

Фагъирдикай хабар жеда фагъирдиз,
Язух къведач чара касдин фикирдиз.

Бахт атана, къвазда, гатаз дак1арар,
Кесиб фида гьа и ч1авуз ахварал.

Вац1ни тадиз, ам атайла кьурада,
Вирибуруз сир я вичин мурадар.

Бахтлу кас я, бахт мукьувай такурди,
Кьат1ун гудач, язухвиляй уьмуьрди.

Нагьакьвилер акурлайни чилерин,
Жуван бала аквадач хьи вилериз.

Са аламат акуна заз, чарадан,
Гьик1 цуьрнуьгъар къекъвезвайт1а кьарада.

Михьи са кас акунивди, рахазвай,
Чун виридлай бахтлу лугьуз, къугъвазвай.

Тариф ийиз жуван кьац1ай зегьердин,
Намуслуди аквада эйбежердиз.

Сад я вири, акьул тахьай гьайванар,
К1ант1а вак1ар хьурай, к1ант1а инсанар.

         * * *

Хабар кьазва:"Къаламдикай вучзава?
Турди зегьер дувулдилай пучзава.

Абас патал рекьизва чеб ханари,
Вуна жуван кьил кутазва къанарик".

Лал хьайит1а намусни са фагъир хьиз,
Элкъведа хьи яваш-яваш нехирдиз.

Хабар тушиз вири гьаник акатда,
Фад аватда лайихвални къаматдай.

И гьалдикай кич1е хьунни дугъри я:
Пара хьанва и дуьньядал угърияр...

И кьиса зи рик1ел хтай береда
За фикирна: кверелди, са жуьреда,

Кьве гафунив кхьена хьиз куьтягьда,
Архайин ацукьна ахпа теспягьда.

Тирт1а имай уьмуьрдикай пачагьдин,
Чи фикирар желб ийидай темягьди.

Рик1ин хиял тухудайвал яргъариз,
Гуя вакай хабар жедай гъуцариз...

Гьик1 ят1ани, уьмуьрдин гьал четин я,
Авурди яб к1аник, мад архайин я.

Вил вегьена, килиг садра иердиз,
Инсанарин авамвилин тегьердиз.

Яваш-яваш акьул виниз фейила,
Ахмакьвилер хьанач са к1ус т1имилар.

Чарадан зат1 кьада чна пайдахиз,
Ахмакьвиляй чарадандал дамахиз.

К1евевайла жуванди чаз чир жеда,
Амай гагьда паталлайди п1ир жеда.

Чахъ к1ани кьван ават1ани кьегьалар,
Багьаз кьада патал алай качалар.

Низамини фенай бегьем яргъариз,
Лейлидикай вирибуруз хабариз...

Хабар кьуна чакъалдивай, ч1ар фейи
"Асландин гьал гьик1 я, бахтавар хьайи?"

"Фуу"- лагьана, ч1ар фейи тум хкажна,
Саврух беден инихъ-анихъ акъажна.

Эсер хьана и гьал акур мугьмандиз,
Вил кьулухъиз, ахладна ам пашмандиз.

Са кар пис я: тумакь, гачал къаргъадиз
Лекь усал яз аквада, вич бугъа хьиз.

Ч1ур хьайиди са кар я- вич лекь лугьуз,
Пад илисда лекьрел, ам негьякь лугьуз.

Лекь лугьунни вичиз - имай зарал туш,
Амма масад кьарада тун гьалал туш.

Алакьдат1а, твах жува жув кьегьал хьиз,
Алакьдачт1а, ацукь к1ац1ал, качал хьиз.

Вири язва ахмакьвилин лишанар.
Лап сифтедай чун вири тир гьайванар:

Гьавиляй сад маймунвилиз хъфизва,
Ахмакьвиляй, мефт келледа к1тизва.

Халкьдин къамат са шаирдиз пара я,
Муькуьданди пул авайдан чара я.

Вуж хъсан, вуж пис ят1а, им гьажет я,
Гьар к1валахдиз к1анзавайди къимет я.

Гелкъвейт1ани девлетарихъ, хийирдихъ,
Т1вар багьа я, т1вар амукьда эхирдихъ.

Са кардал зун алахънава к1евелай,
Гьар са кардив агуч1айла, эвелай

Дугъривилин нур акурай ц1арарай,
Авуд ийиз акьул, намус ахварай.

Гьуьрмет ийиз инсанвилиз т1варц1евай,
Гъалат1арихъ къекъуьн тийиз ц1арц1евай.

Гъалат1ар хьун чан алайдан гьунар я,
Мах тк1уьрун гъалат1рикай азар я.

Килигайла вун чарадан гъалат1риз,
Ваз кеф жемир, ам ваз багьа савкьат хьиз.

Са гаф лугьун, къуншини кваз шагьид я,
Белки вунни гъалат1 себеб гъайид я.

Акьуллудаз гъалат1 авун туьгьмет я,
Ахмакь касдин уьмуьр вири къелет я.

Къизиларин кьулай кьуруш аквада,
Жуван кьуруш къизил лугьуз рахада...

        * * *

Ни фикирнай, юхсул, сефигь гададай,
Мерженар хьиз, эч1еларин арадай,

Лап акьуллу манияр, аламат хьиз
Акъатзавай, фикир гайла, савкьат хьиз.

Гуьрчеквилин нур аватай бендедал,
Гьевесдинни гел жеда са геренда.

Садбуруз им аламатдин кар хьана,
Садбурунни кефияр къумбар хьана.

"Керимакай,- лугьузва,- шаир хьана,
Аквар гьалда, дуьньядин эхир хьана.

Ашкъидикай мани лугьуз, вуч хьана!
Гьайиф я гил, ви чан гьавай пуч хьана.

Вуж ят1а лагь а темягькар, гьаясуз?
Гъида чна ваз, Керим, ам чарасуз!

Гьарда вичин акьул-гьая фад кутаз,
Ацукьнавай зарафатрик дад кутаз.

Эхир вири зарафатдиз элкъвена.
"Куьн ахмакьар",- лугьуз Керим хъуьрена.