Ханбубадин ихтилат 51

- Анлай инихъ са кьадар вахт алатна,
Са варз вилик мад хванахва акъатна.

Каш-мякь ийиз ацукьна чун айвандик,
Ахъайна заз рушакай мад мугьманди.

          * * *
      Ханбубадин ихтилат.

- Ахкъатна чун к1вализ яргъал рекьерай,
Зи фикир тир гададиз ун мехъерар.

Рушни гьатна, марал хьтин гуьрчек тир,
Гьар к1валахдал, гьар са кардал зирек тир.

Пара рик1из чими, халис инсан тир,
Тек са хесет авачирт1а хъсан тир.

Раханач хьи, гьикьван адал алахънай,
Кихлигнариз, фаларни хъиз суракьнай.

И кар себеб яз папа къал къачуна,
- Им вуч зат1я, на гьинай им акуна?

Рекьел алай къван яни на хкайди,
Гьинва адан диде-буба, цгъайди?

Идакай вуч юлдаш хьурай баладиз,
Рахаз тежез, к1ула гьатна шала хьиз!

Гададизни мад папа гьич яб ганач,
Зи хиялар, зи фикирар таб хьана.

Шел-хвал ийиз хъел авуна папани,
Гатайт1ани хъувунач мад хап1ани...

   Садра гъуьрчез фейи гада хтанач,
Мукьва-кьили хуьруьнвияр атана.

Кьежей мецез к1усни акьул куьмек туш,
Я гъейрат, я намус адаз герек туш.

- Рушахъ галаз хуьруьз бала атанва,
Чи бахтарни ам себеб яз ат1анва,-

Къуншидаллай са кафтар паб рахана.
Рази хьана атай вири инсанар.

Парабурухъ рушар авай тхудай,
Парабурухъ авай чпин умудар.

Руш вигьирвал хьана кьакьан синелай:
Алатда гьа, халкьарни фад рекьелай.

Эхир чара хьанач, йифиз чинеба,
Магъарадиз тухвана руш, кирсеба.

Ахпа к1вализ хтана къал акъудна:
Гьараярна, паб ахварай авудна.

К1валевай руш квахьна, цуьк1уьн т1вар хьана,
Гьарай-эвер - мягьледиз хабар хьана.

Йиф мич1и я, экуьнихъ фад экъеч1да,
Вири халкьар рушахъ къекъвез эгеч1да...

   Экуьнихъ зун фад къарагъна мисикай,
Ял гана фад фена дагъдин к1аникай.

Хуьруьнбуруз, гьеле хабар тахьанмаз,
Къунши хуьруьн патарив чун атанвай.

Инихъ-анихъ килигна мукъаятдиз,
Чинеба чун акъатна са гьаятдиз.

Тек дишегьли, зи вах тир ан авайди,
Тапшурмишна за адал захъ галайди.

Шал къачуна тадидаказ хтана,
Жемят алай чкадал зун атана

Ик1 лагьана, - А руш вац1у тухвана,
Амукьайди шал я, ам за къгъана.

Руш туна за вахан к1вале куьмек яз,
Пекер алук1на гададин- эркек я....

           * * *
 Секинсузвал акур ч1авуз, жегьилдиз
Лагьана ик1, - Рекьиз экъеч1 кьезилдиз.

Белки амай Сейда жеди, чидач заз,
Гьавиляйни и кардал шак гъидач за.

Алук1 жувал хъуькъверагрин парталар,
Тахьун патал гьавайда къал-макъалар.

Заз хьайивал вазни за гил ахъайда,
Яб це, тахьуй ихтилат и гьавайда.