***

БИЛБИЛ

Ст1ал Сулейманан саягъ

Хуьруьн багъда мани лугьуз,
Манидихъ кваз аваздин зил,       
Йикъан чагъдиз мажал тагуз,
Девран гьализ ава билбил.



*Гьузурдайвал ч1алар тесниф               
Ийиз,  я кьван устад ариф.
Гьелбет, авай , гьай жез тариф,               
Элдин сиве-сара, билбил.



Мулкар акваз хуьруьз мукьвал,-               
Чарх гуз элкъвез синел, к1унт1ал,..
Сейр ийиз к1убан яз гьал,
Гагь жез  сува-кала, билбил.               
 


Гзаф квайла ашкъи - гьевес,
Акъваздачир  ялни-нефес.
Теснифрин, лугьузвай серес,-
Кьадар тир хьи пара, билбил.



Ширин ванциз, шад яз гуьгьуьл,
Яб акализ, тежез къуьгьуьл
Зунни къведай, хьиз вал «пехил»,
Авайла вун тара, билбил.



И йикъара,  вучиз ят1ан,
Дегишнаваз атана ван,               
Гъавурд т1акьар, ц1ийи ч1алан…
Ч1ал тир хьи ам ччара, билбил?



А ви ванцин хас тир аваз
Мажбурнани авун даяз?
Суалар гуз, хабарар кьаз…
Ат1анан ви чара, билбил?



Алцур тахьуй кткай ч1авал, -
Девир хьанва усал, нахал.
Муьгьтеж туш вун бед авазрал…
Жемир акьван гара, билбил. 


На лугьузвай, чаз тир  масан, -
Севт1 квай аваз, верци ч1алан,
Тухун герек эхирдал кьван…
Уьмуьрд шеле-хара, билбил.



Фикретазни атанва хъел
Туширвиляй а кар бегел.
Туьхк1уьр хъия, тежез энгел,
Авур гъалат1, ч1ала, билбил.

2022. 09.

*Гьузурдайвал – желбдайвал, кьат1удайвал