Самадан эхтилат 50

Эхтилатар ийиз-ийиз йиф хьана,
Мецеллайди жегьилрин тариф хьана.

- Ахъая дах вал гьик1а руш ацалтнай,
Са йис вилик на чаз са эхтилатнай.

- Гьахъ я Селми, са йис кьван я алатна.
Ацукьнавай зун са синел , галатна.

Гьепкеярни балк1андилай алудна,
Недай са к1ус гьалал ризкье акъудна.

Килигзавай секиндаказ яргъариз,
Мархалривди ац1ай рагъул к1амариз.

Секинсуз вац1 гур-гур ийиз рахазвай,
Къацу хурал циц1ер, ч1ижер къугъвазвай.

Гагь нуц1 рахаз, гагь пузари був ягъиз,
Гагь мукьувай чакъалари къув ягъиз.

Лекьерини чархарзавай цавара,
Мад са гъалаб сес авачир дагълара.

Суст хьайи хьиз акатнавай хиялрик,
Фикир тухуз гьар жуьредин суалри.

Вилерикай садлагьана карагна,
Гьасятда зун къалаблух кваз къарагъна.

Аватай хьиз цавай, са к1унт1 аскерар
Килигзавай акъваз хьана рекьелай.

Са жегьилни галай, бегьем аял хьиз
Аквадай вич, тегьерни са марал хьиз.

Вилик квайди чир хьана заз к1алубдай,
Кьат1узва за гил а к1валах, тажубдай.

Хванахва тир ам са яргъал хуьревай,
Са ц1уд жегьил аскердин вич кьилевай.

Ахъайна заз кар хьайивал дустуни,
Гьалт хьана чеб и жегьилдал бахтунай.

- Са алчахди рушал гьужум авунвай,
Адал алай парталарни къазунвай.

Бахт хьана чун гьалтна адал и дагъда,
Низ чидай вуч акъатдайт1а гъуьлягъдай.

Яна келле гадарна ам дагьардиз,
Фагьум ганай за гуьзелдин дидардиз.

Язух хьана, маса пекер алук1на,
Ваъ талгьана, балк1андал ам ацукьна.

Чукьни тийиз, вич вичивди шехьзава,
Аквар гьалда са гъам рик1е эхзава.

К1ан хьайит1а, ахъайрай сир рик1евай,
Са югъ я чун гьа и саягъ рекьеваз.