Серсер хьана килигзавай мугьмандиз 49

Вад суалдиз жавабарни гайила
Вуч ама мад, гьахъ-гьисабар хьайила?

Серсер хьана килигзава мугьмандиз,
Пергъер хьайи партал алай мазандиз.

Акьулдикай сесиналлаз дагъ хьана,
Лап цаварив агакьар кьван тагъ хьана.

Зар-зибадив ч1агурнавай ашукьар
Цуьк1 хъхьана мугьмандин сес галукьай.

Гаф гайила хуьнни авун герек я,
Жавабар гуз Селми гьак1а зирек я.

Тавакъу яз бубадиз ам килигна,
Чунгурни мад айванд пип1е эцигна.

Бубади,- Вун вуж я?- лугьуз жузуна,
- Таниш туш чаз ви сесни ви рахунар.

И арада Али вилик экъеч1на,
Муминакай эхтилатиз эгеч1на...

Яваш-яваш халкьарик къал акатна,
Жегьил-кьвези вини к1вачиз акъатна.

Амма гелни амач муькуь гададин-
Дабанрай ц1ай акъатзавай зурба тир.

Ялав хьана катна, Мумин себеб яз,
Чукьни унач рушазни, я эдеб яз.

Са кьадар вахт алатайла Самада
Ик1 лагьана,- Чаз чида ви баядар.

Магьрум хьайи ашкъидикай Муминан,
Таниш я чаз сузаярни ифинай.

Каш-мякь ийиз эвер гана айвандик
Алидизни, хирер алай мугьмандиз.

          * * *
         Мумин.
Ви гуьрчеквал ухшар ава цавариз,
Тамарзлу эрзиман экуь ялавдин.
Минет я руш, килиг вун зи гьалариз,
Есирнавай муьгьуьбатдин жилавди.

Маса гайи ашкъидикай бахт жедач:
Гьар са касдиз намус, камал лазим я.
Тахьайдакай, бине, имарат жедач:
Асул-бине хьайи ч1авуз даим я.

Зун са зайиф бенде я ви виликди,
Ви эмирдиз табий хьун заз лайих я.
Гуьгьуьлар зи незва агъур гъарик1ди,
Яр такурлай и дуьнья заз дарих я.

Ви гафунин михьивилиз гьуьрмет хьуй-
Стхавилиз кьабула зун азиз руш.
Зи дерди-гъам, зи ашкъи ваз минет хьуй,
Бейкеф жемир Муминакай азиз руш.

          * * *
         Селми
Ачух дуьнья садазни дар тахьурай,
Регъуьвилиз к1ур тагурай намусди.
Дугъривални инсандиз пар тахьурай,
Герек авач намус тахьай я дустни.

Къекъвейдазни бахтунихъ гьуьрмет ая,
Ашкъидални рахай ч1авуз бат1улмир,
Эхирдалди акьулдин суьгьбет ая,
Меслят къалур тавурдини бат1улмир.

Айиб мийир дугъри рекьел алайди,
Къилихрикай къайда-тегьер хьун патал,
Гужа гьатда халис рекьел алайди,
Мегер тушт1а машгъулат-уюн патал.

Гуьрчек фикир эхир хьайи хъсан я,
Амма гьайиф, къаб хайит1а гел жеда.
Жаваб тахьай муьгьуьбатни гьижран я,
Хайи рик1ел уьмуьрлух яз гел жеда.

Ви ашкъидин, ви намусдин хатурдай,
Зи патай ваз гьар са ч1авуз гьуьрмет я,
Къенин къалай къуз и гуьзел уьмуьрда
Зун вах я ваз, вунни чаз са девлет я.