Жуван гьисер лайихлудаз багъиша 48

Ашкъидикай темягь хьана сефердиз
Экъеч1айдаз кьадар-гьисаб герек я.
Килигна зун и назлудин тегьердиз6
Вичеллайди зар-зибадин ипек я.

Вуч я дуьнья ашкъиди ц1ай туьхвейт1а-
Чунгурдайни сес акъатда суза хьиз.
Зун рик1евай дердерикай рахайт1а,
Зи гьар са югъ аквада квез къаза хьиз.

Фикир хъсан я намус гваз хьайит1а,
Тахьат1а бес вич куьниз ухшар жеда.
Буй бухахда акьул даяз хьайит1а,
Багъди кьулал ам са усал тар жеда.

Хата туш лук1 хьайит1ани хиялрин,
Лук1вилева чун намусдин гьамиша.
Зун алахъда жаваб гуз ви суалриз,
Жуван гьисер лайихлудаз багъиша.

          * * *

Са гаф лугьун яб це куьне
И дуьнья ахвар я гуьзел.
Гъам рик1е кьил авайд вине
Кьегьалдиз ухшар я гуьзел.

          * * *

Бязи крар ийиз гьайиф,
Алатайла гъарик1 жеда,
Галтуга к1ант1а югъни-йиф,
Виридлай вахт вилик жеда.

          * * *

Тахьай ч1авуз хажалат я,
Зи мурад гьуьрмет я ашукь.
Хабар кьамир са бубат я-
Сагъламвал девлет я ашукь.

          * * *

Сад Аллагьдин кьадарар я,
Т1ямлу хьайи зат1 я ширин,
Амайбур буш хабарар я
Булахдавай яд я ширин.

          * * *

Гьарда вичин фикирдив ам кьат1уда:
Девлет хьайи фередихъни т1вар жеда.
Нефс хьайи туш пуларивди ац1удай,
Тахьай ч1авузни дуьньяни дар жеда.