Фикир ая и суалриз дикъетдив 46

Милайимдиз чунгурдал гъил эцигна,
Регъуьдаказ куьчедиз ам килигна,

Чара авач, башламишна т1алаб яз,
Куркурдин сес акъатна хьи гъалаб яз.

            * * *

Жуван хъвалав к1ан я жуваз лайихди,
Пучда намус узгъундини, къанихди.
Жизви акьул хьайит1ани хъсан я,
Намусдин к1ус рик1евайди инсан я.

Булахдикай яргъаз фейи сел хьанай,
Пак къилихар лайихдан мецел хьанай,
Ашкъидин к1вал мублагь хьайи хъсан я,
Пара к1ан туш, хатур ая - инсан я.

Ич1и хьайи умудар низ герек я,
Вахт къведалди сирер вири гуьрчек я,
Са кьадар чеб дуьз хьайит1а хъсан я,
Тахьайт1а мад айиб мийир - инсан я.

Чир жеда къадри зегьметар къачурдаз,
Адакай вуч хабар я гуж такурдаз,
Рик1ин сирер сад хьайит1а хъсан я,
Тахьай ч1авуз, мад вуч ийин - инсан я.

Фикир ая и суалриз дикъетдив,
Хкахь тахьуй рик1ера ц1ай гьуьрметдин,
Пуд суалдиз жаваб гайт1а хъсан я,
Бейкеф жемир, зунни зайиф инсан я.

           * * *

Са гаф лугьун яб це куьне,
И дуьнья са пар я ашукь.
Гъам рик1еваз кьил я вине,
И тегьерни низ я талукь?

           * * *

Ц1айлапан хьиз, ялиз югъ-йиф,
Гагь акъатна гъарик1 жеда,
Гагь агалкьдач, ийиз гьайиф,
Вуч гьамиша вилик жеда?

           * * *

Девлетарихъ къачуз тежер,
Тахьайт1а вич азият я.
Лагь ашукьар чаз и сефер
Им вуч ят1а, мукъаят яз.

           * * *

Т1ебиатдин т1арам-абур,
Ам себеб яз гуьрчекди я,
Вуч ят1а лагь ийиз сабур,
Вич виридлай герекди я.

          * * *

Гьарда вичин фикирдив ам кьат1узва,
Бул хьайит1а гагь вичикай пар жеда.
Нефс хьайи туш гьеле адав ац1узвай,
Вуч тахьайт1а гуьгьуьлар гагь т1ар жеда?