пуд суалдиз ни гайит1а жавабар...

Салам гана чарадазни жувандаз,
Экъеч1нава Селми гъвеч1и айвандал.

Лацу пекдин партал алаз бедендал,
Лал хьайи хьиз халкь ава са геренда.

Къугъурзавай этег серин шагьварди:
Вил ат1удач килигналди маралдиз.

Къе вуч и руш малаикрин тай хьана,
Фелекдини адаз халис пай гана.

Чунгур авай гъилерин наз ширин я,
И руш акваз т1ебиат архаин я.

Ац1айт1а хуьр жегьилривни т1имил я,
Акун патал герекди тек кьве вил я.

Хунчадаллай марвардин са цуьк хьтин,
Ширин-ширин къугъвазавай нуьк1 хьтин.

Чунгурди сим гьавадивди рахуриз,
Шавгьвардивди атирар гвай къугъуриз.

Далда такваз рагъ авачир эхъендик,
Кинарзавай шагьвардини темендив.

Алдатмишиз гуьзел, ч1улав вилери,
Са бязибур атанва ин сефердиз.

Гуьрчеквилин лук1 хьайит1а хата туш,
Инсанвилиз к1ур гайиданд гьая туш.

Гуьрчеквилиз къамат гуда чидайда,
Тийижирдан гьерекат я гьавайда.

Гъам гъусадин дердери рик1 кайит1а,
Муьгьуьбатдихъ сес авачиз хьайит1а,

Хьайит1ани гуьгьуьл хана етим хьиз,
Гьар жуьредин хиялар къвез фагьумдиз,

Гуьзелвилин тахсир я ам, бат1ул туш,
И кьат1унар рик1изни я кьасул туш.

Гьар зегьметдихъ вичин къимет, мас ава,
Гуьрчек тандал вич хьтин либас ала.

Хкаж хьана бубади ик1 лугьузва,
-Вад суал зи руша къе квев вугузва.

Пуд суалдиз ни гайит1а жавабар,
Адахъ галаз жеда зи гьахъ-гьисабар.

Гаф гайивал, лугьузва за, а касдиз
Жеда вичиз зи рушакайни свасни.