Селмидал вил алаз куьче ац1анва 44-2

Селмидал вил алаз куьче ац1анва
Хуьруьнбурув. Ашукьарни атанва.

Мани лугьуз рахазва сад шириндиз,
Ахпа масад къвезва лугьуз йигиндиз.

Бязибурун нек алама п1узаррал,
Бязибурун яшар хьанва, ухшаррай.

Вилер ала вирибурун маралдал,
Акъат тийиз шикил-къамат хиялдай.

Са кьадарбур ашукь хьанвай пешедал,
Акъвазнава гьейран хьана куьчедал.

Веревирдер ийирбурни пара я,
Вичин фикир гьар са касдиз багьа я.

Рик1евайди ачух авун виридаз
Герек яни, сир ят1а ам к1анидаз?

Алк1анавай къванци к1аник яд фидач,
Ат1ун тавур емишдини дад гудач.

Кар авурдан кьулухъай эл рахада,
Тавурт1а ам са касдизни аквадач...

Савда садав вугузва гагь суалар,
Гагь хиялдиз атай гьак1ан миск1алар.

Селмидин гафунихъ вири агъунва.
Селмидивай дидеди ик1 жузунвай.

Я чан бала, ин амалар дуьз яни,
Я тахьайт1а вун са гьаясуз яни?

Белки п1еркьи, белки са ягьсуз жеда,
Лугьуз жедач, белки са муртад жеда,

Вучиз на ви жегьил уьмуьр пучзава,
Жуванбуруз, мукьвабуруз гужзава.

Милиз хъверна секиндаказ Селмиди
Ик1 лагьана,- Я чан диде, куьчедиз

Килиг хъсан и ашукьриз диганвай
Ни эверна абур иниз атанва.

Зарафатдикай абуруз ч1ал хьана,
И кар себеб зунни дарискъал хьанай.

Са кьадар вахт ийир-тийир квахьна,
Ахпа цавар хьтин гуьгьуьл алахьна.

Са суалдихъ авайди са жаваб туш:
За разивал тагайт1а ам гьисаб туш.

- Тапаррихъни килиг гьа эхир жеда,
Акваз-такваз тапаррин есир жеда.

-Садазни за шей лагьана минетнач,
Ят1ани и алай гьалдиз гьуьрметна,

Хиве кьур кар эхирдалди тухуда.
Мадни са гаф диде за ваз лугьуда.

Ширин_цуру т1ямни гьеле такунвай ,
Кьил цава кьаз, вич-вичихъ ам агъунва.

Чара тахьай таб я зани авурди,
Хатур хадач саданни зи абурди.