43

       ***
Али тадиз эвич1айла дагьардиз
Са зат1 къвез акуна вичин къаншардиз.

Я аламат! За ягъайди ничхир я,
Амма ина авайди са фагъир я.

Уфт аладриз, капачривди чин кьуна
Зурзазва вич, бегьем лап ифин кьуна.

Ст1ал-ст1ал ивидикай сел хьана
Какахьзава камавай цик, гел хьана.

Фийир-тефир квахьна са ажуз хьана
Инихъ-анихъ галукьиз бахтсуз хьана.

Гагь къахрагъиз, гаагь элягьиз чанта хьиз,
Аман фена, чан фейи са кьант1а хьиз.

И аламат акурлай мягьтел хьана
Акъвазнавай гъуьрчехъан энгел хьана.

Мад алукьай, гъилел адан хер хьана,
Язух хьайи, фагъирдай эвэр фена.

Тадидаказ, акурлай алукь хьана,
Алиди ам къахрагъарна юкь къуна.

Хабар кьуна:- Вун ини гьик1 акъатна?
Хъсан хьана зи гъуьрч иниз аватна.

Ихьти к1валах садрани заз акур туш,
Кич1е жемир, куьмек гун чаз агъур туш.

Чан акъатай ц1егьре, вич акадарна,
Са рагалай дагьардиз хкадарна.

Аламатар и дуьньяда пара я ,
И аламат заз гила ашкара я.

Гьар аламатдин иеси Фелек я:
Ракъурнава зун ви кьилив куьмек яз.

Гужуналди ялна ада винелди
Ахкъудна а фугъара са мет1елди.

Ивид кьуна, зурзазавай ашукьдин
Язухарна, ц1ай хъувурлай кьулухъди

Эхвич1на мад дагьардиз, гъуьрч вахчуна,
Гужуналди винелди ам галхч1уна...

Йифди к1ама гишинни яз, мекьи яз,
Эквни такваз, на лугьуди буьркьуь яз,

Ивияр физ, вич вичивай къакъатна,
(Аламат я ам Алидал ацалтай).

Михьиз хирер, пеш эцигиз, к1еви из,
Пекералди кт1униз са жизви хьиз,

Недай, хъвадай гана язух фагъирдиз,
Рекье гьатна пар хъъяна къатирдиз.