Уст1ардикай кьиса 42

       * 6 *
       
Гьуьрмет авун герек яни виридаз?
Хъсан я ам гьуьрметар чир жиридаз.

Аллагьди пай тагайдаз ам герек туш,
Авурт1ани, а касдиз ам куьмек туш.

Т1вар паталди гьуьрмет авун гунагь я,
Акурт1ани ваз а к1валах темягь яз.

Куьмек гудай ч1авуз вучиз фикирнач
Низ гузват1а. Вуж ят1ани килигнач.

Жуван гъиле авай гьалал на ихтна,
Саваб хьиз чарадан кьамал илит1на.

Савабдикай хийир къачуз к1ан хьана,
Жува авур к1валахдал гьейран хьана.

Гил манийвал хьайила а касдикай,
Фикир ая жуван гьал сарасдаказ.

Агъудикай хуьн патал ваз герек я
Туп1авай кьел- ам ви чандиз куьмек я.

Кьилелай элкъуьриз вегь на ялавдал,
Алатда ви кьилел алай ч1улаввал.

       * 7 *
       
Са кьвед-пуд варз алатайла кьулухъди,
Уст1арди чан хъит1кьинзава ажугъдив.

Эх тахьана, физва кьилив алчахдин,
Са къванцихъ ам галк1ана са саяхди,

К1вачер цавуз акъатна хьиз лух хьана,
Ярх хьана ам чилелайт1уз, рух хьана.

Гъилни хана адан, лап ахмакь хьана,
Уфт алатна, пелелайни гьякь фена.

Мад фена ам фекьид патав, минетна,
Фекьидини акунмазди туьгьметна:

"Им ви кьилел атанвайди къаза я,
Ви рик1ени авайди са жаза я.

Хъел акатна кьисас вахчуз ял гана,
Килиг гила ваз вучтин завал хьана.

Хабар туш ваз адаз хьайи т1алдикай,
Фагьум ая вуна жуван гьалдикай.

Писни-хъсан чи Сагьибдиз аквазва,
Гьахъни-гьисаб адахъ гьардан авазва.

Гунагь къачуз, адан рекьел экъеч1мир,
Жуван гьакьар-гьисабар гваз эгеч1мир.

Ваз чизвайди марфадин са ст1ал я.
"Аллагьдин кьадарар" лугьун - гьалал я!