Мумин са маса ашукьдал гьалтна 41

Мумин физва, ат1узва дагъ-тепеяр,
Гагь юлдашар жезва куьлуь пепеяр.

Був ацалтна, к1ват1 жеда гагь ч1ижерни,
Гагь гьарайиз, къугъваз жеда циц1ерни.

Гагь нуьк1верин сесер къведа шириндиз,
Хъсан тира ярх хьана архайиндиз

Т1ебиатдин къулайвилиз къуллугъиз,
Хушвилелди гьисер жуваз муьт1уьгъиз.

Мад сеферда тухузва ам хиялди,
Я ацукьар вахтни тагуз мажалди.

Муминаз са жуьребан мад ван хьана,
И к1валахдал ашукь лап гьейран хьана.

Тадидаказ физва гада дагъларай,
Вуч ят1ани- Аллагьдин я кьадарар.

Винел хуьре гуьрчек рушан т1вар ава,
Белки ана язух касди яр ава.....

   К1ан хьайила руш атай са мугьмандиз,
Разивална руша бегьем дак1андиз.

Амалдарвилелди са шарт1 т1алабна,
Зарафатдай ада и кар гьисабна.

-Чунгур гъиле авайдаз ам талукь я,
Суалриз жаваб гайиди ашукь я.

Рази я зун гайит1а дуьз жавабар,
Ахпа жеда вири гьакьар, гьисабар.

Рушакай гил гуьзел са метлеб хьана,
Гзаф ашукьриз и кар себеб хьана

Къвез хъфизва парабур гьар сеферда:
Садни хьанач рушан рик1из эсердай.

И мукьвара мад са межлис к1ват1 жеда,
Хуьруьнбуруз ажеб мярекат жеда.

Зарафатдив лагьай гафар гьахъ хьана,
Гаф гудайла алайдини халкь хьанай.

Гуьрчеквални ганва вичиз Худади,
Манийвални авач диде-бубадин....

  Муминаз авайди маса фикир я,
Муминанди бегьем четин жигъир я.

Халкь авайна хабарарни гзаф я ,
Муминаз герекди тек са-кьве гаф я.

Гьинай-гьанай садаз-кьведаз сес хьана,
Фикир авур Муминаз гьевес хьана...

  Дагъди рекьел адал са кас ацалтна,
Ялар ягъиз ацукь хьана, агалтна.


Инхъа-анхъа ихтилатар кувудна,
Муминай лап бегьем ч1алар акъудна.

Ашукь тирди къалурзавай чунгурди,
Къурху гузвай юкьвал алай гапурди.

Мумин тирди чир хьана, чин ч1ур хьана,
Фикирна фагъирди: беябур хьана.

Гьасятда вич усал тирди кьат1ана,
Буш келледиз алчах фикир атана.

Руш гъиляй ахкъатда- идал шак алач,
Буш келледа маса тадарак авач.

Жезни-тежез фагьум-фикир авуна,
Яргъалай са гуьт1уь жигъир акуна.

Вилик кавай Муминан лап далудлай
Лаш вегьена дагьардиз ам авудна.

Думпадумпиз аватна ам туп хьана,
Эхирдихъай акъатай ван гумп хьана.

Тадидаказ гьерекатна гадади,
Ахпа зурзаз ацукьна са далдадик.

Авур к1валах пис акуна жегьилдиз,
Гила геж я- есир хьанай пехилдин.

Фикир, фагьум сифте хьайт1а хъсан я,
Кар хьайила амукьарди гьижран я.

Селмидини яваш-яваш чир ийиз,
Лугьуз хьанай манияр, фикир ийиз.

Чунгур къугъваз бегьем са уст1ар хьана,
Селми хъсан ашукьдиз ухшар хьана.