нуьк1ни мурдар 39

Фикирривди суст хьайи са береда,
Къал-макъалдин гьатна ванер дереда.

Кьве нуьк1 ава чархар ягъиз куьлерал,
Кич1евиляй ийизвай пис эверар.

Сада чилел вигьизва вич к1умп хьтин,
Ахпа цавуз хкаж жезва туп хьтин.

Гагь къармахар экъисзава лекьре хьиз,
Гагь луварив гатаз гьава к1ек1ре хьиз.

Цавай чилел вигьизва са саягъда,
Гьужум ийиз чилел алай гъуьлягъдал.

Ингье гъуьлягъ яваш-яваш хилерлай
Виниз физва, мертедин са куьлерлай.

Сеймиш тийиз нуьк1вериз гьич яб тагуз,
Я чандизни вичин к1ус азаб тагуз.

Куьлер кьулаз гьахьна физва винелди,
Нуьк1веринни гьарай ава ишелдин.

Муканалла са афтедин шаракар,
Ч1ив-ч1ив ийиз ахъайна сив-чапакар.

Мягьтел хьана килигзава нуьк1вериз,
Ат1узвачир балайри ван эвериз.

Ингье илан бегьем мукьув акъатна-
Садлагьана нук1 мукунал аватна.

Лувар вичин ахъайна муг к1евирна,
Муминаз ин к1валахди лап таъсирна.

Муькуь нук1ре мурдар винел атайла,
Лекьре хьтин зурбадаказ гьарайна.

К1ув экъисна, вичикай са хьел хьана,
Виняй агъуз мурдардин винел фена.

Хьел галукьай мурдардиз лап т1ар хьана,
На лугьуди келледай ц1аяр фена.

Гагь аруш жез, гагь аххъа жез куьлерай,
Аватна ам чилел къацу векьерал.

Патахъдаказ къатадзавай ц1ил хьтин,
Саврухдаказ аквадай сефил хьтин.

Нуьк1вери гил ийизва шад къугъунар.
Балайризни ийиз рик1ер-дурк1унар.

Саламатна чпин хзан чан гана,
И кардалди зунни гьак1 гьейран хьана.