Мумина бубудиз сир ахъайзава 38

Куьк1уьрнава ракъини яр ялав хьиз,
Эгисна хьиз бубудин са патав хьиз,

Рик1ин сирер фикир-фагьум дерин яз
Ахъайзава бубудиз вич сефил яз.

-Сувалла вун безетмишна регъуь яз,
За гьисзава ви къалаблух къайгъу яз.

Нур алахьиз югъди къацу хурудал,
Пагь ат1анай ви гуьзелвал акурдан.

Йиф атана, агаж хьана серин яз,
Вацра к1аник пашман я вун секин я.

Низ герек я ви гуьрчеквал йифериз,
Рагъ хьиз цава, кьулухъ галай циферин.

Бахтавар я са геренда ви назди
Мягьтел авурди есир яз аваздин.

Са декьикьа себеб яз ви т1вар ава,
Ашкъини гагь гьа ваз хьиз ухшар ава.

Садлагьана ялав хьтин куьк1уьда,
Рагъ авай хьиз йиферизни туьхуьдач.

Къекъвез жеда хиялар шад цавара,
Юкъузни ахват тавуна ахварай...

Гьар инсандихъ ава кьет1ен аламат,
Амма сад-кьвед жезва адал гьалават.

Садаз зурба къуват ганва гъуцари,
Садаз девлет, къати яд хьиз вац1арин.

Садаз ашкъи ганва вичин кьадар яз,
Садаз ганва сан авачиз са пар яз.

Гагь муьгьуьбат акси жеда бахтуниз,
Гагь бахтуни акъудда ам тахтуниз.

Гьар са к1валах гъуцаринни дуьз ят1а.
Вучиз инсан бес икьван ягьсуз ят1а.

Заз муьгьуьбат хажалат туш сабур я,
Туьк1вей к1валах гьам инсандин абур я.

Килиг тийиз саврухризни мекьериз,
Я хата квай, я четин тир рекьериз.

Килиг тийиз теклиф авур куьмекдиз,
Гьисди вилик ялзава зун зирекдиз.

Хабар кьурла: "Вун квел хьанва гьалават?"
За лугьузва: "Зиди туш и аламат".

Зунни сир хьиз халкьнавай са инсан я,
Хьайит1ани муьгьуьбат заз залан яз,

Кьадар-кьисмет жуван кьилиз акъудда,
Инсанвилин михьивал за агъуздач".