Мир лагьайла ван тежердаз лаш ая. 35

Мир лагьайла ван тежердаз лаш ая,
Я тахьайт1а к1евидаказ "чавш" ая.

Гьикьван лугьун къабухдавай келледиз-
Герек яни сяйи авун зегьледиз.

Лавгъа хьайи кьил цавариз акъатда,
К1вачерни гьак1 чиликай фад хкатда.

Эхлягьайла хабар хьунни хъсан я,
Хата авач- акьул кьери инсан я.

Хабар тахьай т1иш цавара амукьда-
Келле квахьай тум кьарадал ацукьда.

К1уф винизна мад цаварай рахада,
Кьарадавай тумни беден аквадач.

Балугъ хьтин, такабурдин виревай,
Балугъчидин, кьаз к1ирини, гъилева.

Намус квайди хьайит1а вич зарар туш,
Балугъдиз лагьайт1а зат1ни хабар туш.

Гъиле жеда негьякьдан, аял хьтин,
Ц1ил вегьена тевледавай мал хьтин.

Ишлемишна ахкадарда шалта хьиз-
Низ герек я шив амукьай кьант1а хьиз.

Са югъ тира шив цаварал акъатна,
Ахпа чилел кьант1а хьана аватна.

Лаш галукьай хьиз ава кьил агъузна,
Вичин къимет, вичин абур ажузна.

Кьил ч1акара чуьнуьхнава качалд хьиз,
Кимелай фад кат хъувуна чакъал хьиз.

Тереф хуьдайбурни гила сефил я,
Гьайиф лугьуз Муминални пехил я.

Фикирзава: им инсандин чан яни,
Югъди эхай им са къагьриман яни.

Къагьриман туш, камаллу са ашукь я,
Куь келледиз фикир, фагьум талукь я.

К1ан тахьайт1а садни жедач алцуриз,
Я т1варни ви садавайни кьац1уриз.

Жув вугумир ишлемишиз чарадав,
Усал жедач намусдизни арадай.