Чlурмир зи чlал

Къуватлу я зи хайи чlал, гьелбетда,
Гьи патахъ зун фейитlани куьмекда.
Зун чlал галаз атайди я дуьньядиз.
Къекъвез кlандач заз хайи чlал галачиз.

 Гекъигнава за чlал хайи дидедив,
Заз дидеди  гайи шуьрбет некlедив
 Рикlин къене чка гана хуьда за,
Аксибурун мецин мензил гуьда за!

Чlал паталди   гьатзава  зун гьуьжетда,
Къуват чанда амай кьван за гьуьрметда.
Рикlел хкиз Гьажи Давуд , Эминни,
Кутадач за зи чlалак са тахсирни.

Лезги чlалал гудай чlавуз саламни,
Агъузна юкь  ийиз кlанда икрамни.
 Герек къвезвач лагьай чlавуз лезги чlал,
Гьа  гафуни зи ивидал гъизва звал.

Чlал пайдах я,   амукьзавай гъилера,
Къадир аваз хуьх гьар сада , кlвалера
Хайи чlалаз вафалу хьухь, лезгияр,
Несилризни  чешнелу  хьухь, лезгияр!

Лезги чlала гзаф ава нугъатар,
Тlалабзава ,  хуьх чи чlалан сергьятар!
Чlурмир зи чlал , чи бубайрин аманат.
Чан эцигда за зи чlал хуьз  саламат!

22.06,2022 йис