Ана тил - байлыгъыбыз
Къалыубаладан келген,
Эм багъалы хазнабыз
Миллетни миллет этген.
Анабызча асыулу,
Кюндюз - кюн, кече уа - ай,
Хар сёзю, хар айтыуу-
Жюрекге жау жакъгъанлай.
Он юч жылны ичинде
Таула, басханча туман,
Бир сёз эштмей тау тилде,
Болдула бушуу-бушман.
Бюгюн а тау элледе
Сабийлеге анала,
Сёлешип орус тилде,
Шо не таба болурла!
Сабий садлада да хал
Ма алайды, жарсыугъа,
Иш былай барса уа, халкъ
Болур тилсиз къалыргъа.
Ананыча багьалап,
Сёлешсек ана тилде,
Окъусакъ газет, китап,
Жашар миллет ёмюрде.
Рахайланы Аминат
Ана тил
© Copyright: Аминат Рахаева, 2022
Свидетельство о публикации №122060703328
Свидетельство о публикации №122060703328
Рецензии