Танг алада элимде
Имам азан къычырды,
Къалтырай кетип, кёкде
Чолпан жулдуз да батды.
Танг атханды элимде,
Огъурлу танг, мамыр танг,
Кюн жарыгъын тёкгенде
Гелеу сыртны башындан.
Элпек жайып жылыуун,
Къудуретни жашнатды,
Тюнене жаугъан жауун
Кёлчюкню жылтыратды.
Сюрюучюле эл малын
Отлаугъа чыгъардыла,
Шукур, быйыл бек къалын
Ёсгендиле кырдыкла.
Хар арбазда сабийле
Ойнай жарыкъ оюнла,
Анала уа аш юйде
Сютлени жарашдыра.
Юйюм деген юй тенгли
Таш кётюрюр, - дейдиле.
Элни эр кишилери
Баш тутадыла ишлей.
Ма алайды кюн-кюнде,
Азды сылтау жарсыугъа.
Насып болсун бу элде
Хар юйде хар адамгъа!
Танг атханды элимде
© Copyright: Аминат Рахаева, 2022
Свидетельство о публикации №122060105447
Свидетельство о публикации №122060105447
Рецензии