Ненан хьежар
Йог1учу 1уьйренан исбаьхьа басараш санна,
Маьлхаца дуьнен чу мел долу дахар хаздеш,
Муьлхачу х1усамехь шен малх бу, ю и хъо,Нана,
Цунна ду 1алам а, адам а, стигал а теш!
Шатайпа сирла ду ненан шен доьзале хьежар:
Баьргашца хьоьсту цо жима а, воккха а доьзал.
Доггаха 1алашдеш кхерч ларбан кхоьллина йоза,
Шен сица тергалдеш доьзалийн дахаран доза.
Барам бац, бустам бац, ненан деган безам бийца!
Хьан довха куьг лаац цхьанна а дарбанах хийца!
Оьшуш дац, я хаац деха а доца а дийца,
Ду цуьнца са парг1ат, 1аламат ду цуьнан ц1ийца!
Нохчочун х1усамехь г1оттийла малх нуьре къежа.
Г1ийла ма йуьсийла Нана, хьо доьзале хьежа!
Дахаева Роза 2021,гуьйре
© Copyright: Роза Дахаева, 2022
Свидетельство о публикации №122051406671
Свидетельство о публикации №122051406671
Рецензии