Йа Аллах1, марздехьа Къур1анан йоза

 
Йа Аллах1, марздехьа Къур1анан йоза,
Алсам а довзуьйтуш Исламан дин.
Хилийта х1ора дош маь1на дан говза,
Дарбанца охуьйтуш хесалгаш син.

Йа Аллах1,лардехьа кхетаман доза,
Ц1еначу боккхуьйтуш хааран ког,
Адмашна пайденна декийта хьоза,
Байташца 1абийтуш кийрара дог.

Йа Аллах1,собарца дуцахьа некъаш,
Комаьрша ойлана нисдехьа харш,
Сан сина бахамца хуьлуьйтуш хьекъаш
Халкъана йозанца йеш йолу харж.

Къур1анан бух болуш васташца дазаш,
Доьху аса, нисдехьа х1ора сан дош,
Сирлачу новкъахь йехьа со 1алаш1
Ненан дог д1акхайкхо бакъо карош!
23.04.2022      Роза Дахаева


Рецензии
Дика мог1анаш ду! Байтан (назманан) мог1анашца ахьа доьхучунна Сийлахьчу Аллах1а жоп лойла!
Ларамца,

Асламбек Гайтукаев   08.05.2022 19:33     Заявить о нарушении
Амин,Асламбек! Сино доьху х1ара мог1анаш! Дела реза хуьлда хьуна г1о лацарна керла байт новкъа йоккхуш. Аллах1а шен къинхетамах ма дохийла вай.
Ларамца,

Роза Дахаева   09.05.2022 01:41   Заявить о нарушении