Наш светлы шлях вядзе да зор

Жывём нібыта ў Галівудзе,
Дзе прадаецца ўсё за грошы.
Другім стаў свет – другія людзі,
Але наш край – самы прыгожы!

За што яго мы ўпадабалі?
Бо тут жывуць не абібокі.
Працуюць так, як працавалі
І добра помняць пра ўрокі

Самой гісторыя – адкуль мы...
Свае святыні ў нас, абсяг!
За праўду йшлі дзяды пад кулі,
Не пасрамілі волі сцяг.

Не даўжнікі перед Еўропай,
І моладзь слаўная ў нас.
Уклад і лад, надзённы клопат
Аберагаюць – Бог і час!

Мы памяркоўны люд, аседлы.
Багацце наша – дабрыня.
Шануем дружбу і суседа,
Спакой паўсюль, харашыня –

І чысціня не толькі вуліц,
Вакол паселішч і шашы –
Парадку ў доме змалку вучаць,
Парадак – радасць для душы…

Мы ўсе паклоннікі асветы,
Культурны старажытны край.
Мы ганарымся краем гэтым,
Хоць тут не быў ніколі рай –

Нас прыцяснялі, рабавалі,
Ледзь не садзілі на ланцуг –
Чужынцаў мы з зямлі прагналі,
Вугольчык веры не патух!

Мы верым праўдзе, як ніколі,
Мы хутка выйдзем на прастор…
Мы будзем жыць! Мы прагнем волі!
Наш светлы шлях вядзе да зор.